1345. April 20. Oppeln

In Nomine Domini Amen. Noverint universi presentem litteram inspecturi Quod coram nobis Boleslao dei gracia duce Opoliensi Constituta domina Angnes relicta Franczconis de Lanca pie recordacionis bona fide suo et filiorum suorum nomine se obligavit et promisit Sorori Ewe sanctimoniali de Domo dei solvere et dare unam marcam cum dimidia grossorum Pragensium singulis annis in festo sancti Martini episcopi et confessoris, Racione huius quod eadem soror Ewa suis consanguineis filiis Franconis olim defuncti porcionem bonorum quam in villa Bogusicz wlgariter dicta paterna ex successione obtinebat, cum omnibus et singulis redditibus proventibus quoquomodo ad eandem spectantibus sponte et benivole tamquam legitimis heredibus et successoribus habendam et possidendam iure hereditario resignavit. Condicione huiusmodi interposita videlicet quod si predictam dominam Angnem vel filios eius premissam summam pecunie in quocumque termino solvere nec dare contingeret quacumque negliencia mediante, ex tunc prenotata soror Ewa de eadem porcione et proventibus eius universis se intromittendi plenam et liberam habebit facultatem et ipsam porcionem possidebit temporibus vite sue redditus et proventus omnes percipiendo sine quolibet inpedimento. Predicta vero sorore Ewa ingressa viam carnis universe, porcio sepe dicta et universi redditus et proventus ad eandem spectantibus ad superius dictos filios revertetur sew ad legitimos heredes et successores. Nos autem contractum et resignacionem huiusmodi gratam et ratam habentes ipsam presentis instrumenti et sigilli nostri robore fecimus consignari ad cautelam et evidenciam pleniorem. Datum in Opol xii° Kal. Maii, anno domini M°ccc xl quinto Presentibus nostris fidelibus, Johanne de Kamen milite, Beldo iudice, Wlrico de Grinnicz, Andrea de Grossowicz et Jescone Bechemo nec non Bertoldo Curie nostre notario qui presencia habuit in commisso.

Das wohl erhaltene Siegel des Herzogs hat die Umschrift: S. BOLEZLAI. SECVNDI. . DEI. GRACIA. DVCIS. OPOLIENS.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.